Interviste ne gazeten METROPOL

Pas rreth 6 muajsh në detyrën e Ministrit të Brendshëm, cila ishte gjendja që gjetët në këtë ministri, për sa i përket rezultateve dhe angazhimit të strukturave të saj?

Ardhja ime në krye të kësaj ministrie ishte në kushte shumë më komode se paraardhësi im z.Olldashi. Unë gjeta një administartë të konsoliduar, dhe totalisht të angazhuar në realizimin e përgjegjësive të tyre. Në të gjtha fushat e veprimtarisë së ministrisë kishte programe të qarta dhe rezultate konkrete. Padyshim , edhe për shkak të sensibilitetit që jep tek opinioni apo dhe vetë problematika që egzistonte para korrikut 2005 , rendi dhe lufta kundër krimit të organizuar kishin qënë angazhimet më të mëdha dhe rezultatet më spektakolare. Në këtë kontekst, si ministër isha në kushte më komode për të vazhduar përballjen e sfidavë në këtë ministri falë punës dhe arritjeve që ishin bërë nga kolegu im Olldashi gjatë drejtimit të tij.


Në qoftë se para ardhjes suaj në krye të kësaj ministrie, "suksesi i dukshëm" ka qenë goditja e një sërë gupesh kriminale dhe prangosja e disa eksponentëve të këtyre grupeve, tashmë kush është objektivi, apo e thënë ndryshe filozofia e punës suaj?

Filozofia është tërësisht refklesion i përgjegjësive që ka Ministria e Brendëshme. Veprimtria e policisë në përkujdesjen për rendin dhe lufta ndaj krimit dhe trafiqeve janë vetëm një pjesë e përgjegjësive të kësaj ministrie.
Në aspektin e objektivave strategjik por edhe të angazhimit të përditshëm puna në procesin e realizimit të politikës së decentralizimit të pushtetit lokal dhe projektet e mëdha që janë pjesë e këtij procesi , zënë hapsirën më të madhe të veprimtarisë administrative.
Ministria e Brendëshme , është ngarkuar nga qeveria të implementojë 3 (tre) projekte shumë të mëdha në fushën e regjistrimit dhe dokumentave të identifikimit të shtetasve shqiptar. Kemi projektin për regjistrin elektronik të shtetasve ku përfshihet dhe sistemi i plotë i adresave, kemi projektin e kartave të identitetit si dhe atë të pasaportave të reja biometrike.
Nëpërmjet një financimi të Bankës Botërore po fillojmë realizimin e projektit të menaxhimit të tokës. Po kështu në bashkëpunim me Ministrinë e Punëve Publike jemi gati të fillojmë realizimin e procesit të transferimit të ujsjellësve nga qeveria qëndrore në administrim të bashkive dhe komunave.
Tashmë ka një prioritet të shpalluar nga Qeveria Berisha në drejtim të reformës së pronësis së tokës. Duke qënë se ky proces kërkon dhe një angazhim të madh të pushtetit lokal, ne si ministri e linjës për bashkërendimin e punës midis dy qeverisjeve, po fokusohemi me vëmendje të posaçme në këtë çështje. Do të përshtasim madje dhe pjesë të strukturës sonë për të qënë efiçentë në këtë proces jetik për zhvillimin në tërësi të resurseve të vendit.
Transferimi i pronave që i përkasin pushtetit lokal nga pronësia e qeverisjes vendore është një dinamikë e madhe e cila ka përparuar shumë. Pothuajse në çdo mbledhje të rradhës së qeverisë ne paraqesim lista të tëra pronash që i transferohen komunave dhe bashkive të vendit. Derim tani janë mirauar listat e iventarit të pronave për 160 bashki dhe komuna dhe transferuar 6 527 prona. Nëse deri në vitin 2005 inventarizimi i pronave publike të pushtetit lokal ishte në masën 20% sot ky inventarizim është në masën 80%.
Reforma në administratën publike është një dinamikë e gjërë. Përveç një sërë projektesh që implementohen për rritjen e performancës së administratës , së shpejti do të vemë në dispozicion të të gjitha institucioneve të administratës publike rregjistrin elektronik të pasqyrimit të strukturave, organikave, burimeve njerëzore dhe nivelit të tyre, sistemit të pagave, trajnimeve dhe gradimeve që nëpunësi civil fiton apo humbet gjatë karierës së tij, bazuar të gjitha këto mbi sistemin “e-government”.
Planifikimi dhe programimi i masave dhe mjeteve të gatëshme të përballimit të situatave të emergjencave civile , merr pjesën e saj të vëmëndjes dhe derim tani kemi rezultuar të suksësëshëm në situata të kësaj natyre.
Padyshim që angazhim i pandërprerë do të mbetet lufta ndaj krimit, korrupsionit dhe trafiqeve të paligjëshme. Megjith rezultatet e mira që ka goditja ndaj bandave dhe krimit do të mbetet prioritet i padiskutueshëm ky angazhim.


Pjesë e kësaj filozofia, mos janë edhe hapjet e dosjeve të krimeve të rënda të vitit 1997?

Gjatë këtyre ditëve kam lexuar në një pjesë të shtypit të ditës këtë artikulim që ju i bëtë zbulimit të disa krimeve të vjetra nga ana e policisë së shtetit. Së pari e konsideroj si spekulim mediatik tendencën për të lidhur zbulimin e ngjarjeve kriminale me vitin 1997. Policia e shtetit dhe kryesisht Departamenti i Hetimit të Krimeve të Rënda ka detyrim ligjor të hetoj dhe të zbuloj çdo ngjarje kriminale dhe çoj përpara drejtësisë autorët e tyre. Nuk ka asnjë seleksionim ndër krimet e ndodhura dhe të pazbuluara ndër vite. Gjatë këtyre dy viteve të qeverisjes së kësaj qeverie janë hetuar dhe zbuluar shumë ngjarje që padrejtësisht ishin konsideruar të mbyllura nga policia dhe prokuroria më parë. Madje janë zbuluar dhe ngjarje të ndodhura edhe përpara vitit 1997. Ju kujtoj rastin e vrasjes së ndodhur në Kavajë në vitin 1995, ku u zbuluan 2 autorët e saj. Po kështu janë zbuluar vitet e fundit edhe autorë të vrasjeve dhe rrëmbimeve të ndodhur edhe në vitin 1998, 1999, 2001 etj. Qytetarët duan vetëm një gjë nga autoritetet që mbahen me taksat e tyre. Të godasin krimin dhe kriminelët kudo që ata ndodhen. Nuk besoj se ka ndonjë qytetar të këtij vendi sot që të kërkoj që kriminelet që kanë vrarë, rrëmbyer apo dhunuar të mos dënohen nga ligjet e këtij vendi. Ne kemi me dhjetra raste kur qytetarë të ndryshëm na janë drejtuar për të hetuar mbi vrasjen e të afërme të tyre dhe që autorët nuk janë përgjigjur para ligjit.
Sa më fort dhe drejt të goditet krimi dhe kriminelët aq më të sigurt jemi të gjithë, përfshi dhe ata që bëjnë ndonjë spekulim të vogël gazetaresk.




Zëra të ndryshëm nuk kanë munguar të "akuzojnë" se rihapja e këtyre dosjeve është politike. Si do t'ju përgjigjeshit ju?

Së pari, krimi nuk ka ngjyrë ai është i zi dhe duhet goditur. Së dyti, është e papranueshme të tentosh të dekurajosh veprimtarinë anti-krim të strukturave të policisë së shtetit. Sot për fat të mirë policia është tërësisht e pavaruar nga politika përsa i takon veprimeve operacionale dhe marrjes së vendimeve për realizimin e tyre. Kjo maxhorancë bëri një hap madhor me miratimin e ligjit të ri për policinë. Sipas këtij ligji ministri nuk mundet të japë asnjë urdhër për veprime operacionale nga ana e policisë. Madje ministri edhe mund të mos informohet nga struktura që heton nëse kjo strukturë e gjykon se çështja është shumë e rezervuar. Kjo s’ka ndodhur kurrë më parë. Por unë me keqardhje kam lexuar edhe ndonjë deklaratë sporadike të ndonjë individi që tenton ti japë konotacion politik dënimit të krimit. Madje kam lexuar edhe referime që i bëhen “deklaratave” të mia që nuk i kam thënë kurrë. Megjithëse për mua shpesh herë janë qesharake, ato janë të rrezikshme për opinionin publik i cili i merr si të mirëqena përderisa ato publikohen në shtypin e shkruar.
Duke përfituar nga rasti i kësaj interviste do të kërkoja që referimet apo konkluzionet që çdo aktor i bën çështjeve të tilla që kanë rëndësi vitale me jetën e përditëshme të shqiptarëve duhet të jenë korrekte dhe të drejta.



Lufta antikorrupsion në radhët e Ministrisë së Brendshme e Policisë së Shtetit, ç'vend ka zënë e do të zërë në "axhendën" tuaj?

Padyshim vend prioritar. Por më duhet ta evidentoj se korrupsioni megjithëse egziston në individë të veçantë të strukturave të policisë , ai nuk është më një fenomen. Kam kënaqësinë të deklaroj se nga disa sondazhe serioze të bëra, është rritur dukshëm besueshmëria e qytetarëve ndaj policisë. Kjo është arritur falë edhe korrektësisë dhe performancës së policisë në mardhënie me qytetarët.


Me ardhjen tuaj në krye të Ministrisë së Brendshme, janë vënë re një sërë ndryshimesh, drejtuesish. Pse ndodhin këto ndryshime dhe cilat janë kriteret e tyre?

Nuk mund të themi se ka pasur një “sërë” ndryshimesh. Ka patur një zëvendësim të një z/ministri, ku paraqrdhësi u emërua në një pozicion shumë të rëndësishëm , si çështë pocizioni i Sekretarit Përgjithëshëm të Këshillit të Ministrave.
Nëse i referoheni ndryshimeve në drejtimin e strukturave të policisë kjo është një praktikë normale. Tek njerëzit me uniformë ka një praktikë të njohur të ndryshimeve të pozicioneve pas një periudhe pune. Natyrisht që në disa raste, ato kanë qenë të lidhura edhe me rezultatet e arritura apo për ti dhënë një impuls të ri strukturave të caktuara.
Nëse do të flasim për kritere, ju siguroj se nuk janë shumë. Ato janë të lidhura vetëm me integritetin moral dhe nivelin profesional.

Prej kohësh flitet për një reformë në Ministrinë e Brendshme dhe Policinë e Shtetit. Cilat janë arsyet e ndërmarrjes së këtyre reformave dhe çfarë ndryshimesh të tjera parashikojnë ato?

Reforma është pjesë e perfeksionimit të sistemit që ne të gjithë kërkojmë që të funksionojë. Shpesh herë kjo keq interpretohet me emrime apo shkarkime emrash në pozicione të ndryshme. Reforma e vërtetë për fat të keq shpesh herë i mungon informacionit të publikut.
Ministria e Brendëshme e ka mbështetur realizimin e reformës së saj në disa strategji të rëndësishme sektoriale dhe n/sektoriale. Referimi i të gjthave është zbatimi i detyrimeve që rrjedhin nga zbatimi i MSA. Kështu , strategjia për rendin publik, luftën kundër krimit të organizuar, decentralizimi , administrata publike, menaxhimi i integruar i kufijve, janë të gjitha fushat ku shtrihet dhe realizohet reforma.


Reforma, ka përfshirë edhe strukturën e Ministrisë së Brendshme dhe Policisë së Shtetit. Konkretisht çfarë përmirësimesh priten pas këtyre ndryshimesh të strukturave të Ministrisë së Brendshme dhe Policisë së Shtetit?

Struktura e ministrisë nuk ka ndryshuar. Ne jemi duke studjuar këtë mundësi me qëllim që të kemi një strukturë më efiçente dhe duke ju përshtatur sfidave që ka kjo ministri për të përballur.
Policia e Shtetit ka tashmë një strukturë të re e cila përcaktohet nga ligji i ri për policinë. Implementimi i saj tashmë ka filluar dhe synimi është përqëndrimi i vëmëndjes dhe forcave tek sektorët që merren me luftën ndaj krimit dhe trafiqeve dhe tek realizimi i frymës që ka ligji i ri që është ai i policimit në komunitet. Kjo do të thotë që policia do të jetë më së shumti një instrument shërbimi ndaj komunitetit se sa instrument force.

Pjesë e reformave ishin së fundi largimi i rreth 800 uniformave blu nga shërbimi. Ndërkohë ju nuk keni përjashtuar rikthimin e disa prej tyre sërish në detyrë? Mbi ç'baza e kritere do të bëhet kjo "përzgjedhje"?

Polcia e shtetit është duke implementuar strukturen e re. Ne kete proces në rastet kur do të kërkohet që të plotësohet numri i kërkuar në një sektor padyshim që do të përdoren ato resurse që kanë qënë pjesë e strukturave te policisë. Kjo është tërësisht një kompetencë që i takon Drejtorisë së Përgjithëshme të Policisë dhe jo më ministrit. Jam i bindur se do të vlerësohen ata individë që kanë trajnimet e duhura, integritet moral dhe që janë të gatëshëm të jetojnë me sakrificat që kërkon profesioni i punonjësit të policisë.

Si mendoni të "rikuperoni" eficensën e Policisë së Shtetit, pas këtyre shkurtimeve.

Por nuk ka vend për të “rikuperuar” diçka. Se asgjë nuk ka humbur në efiçencë nga shkurtimet e fundit.

Çfarë parashikon reforma në gradat e Policisë së Shtetit dhe Gardën e Republikës, dhe si do të zgjidh ligji "Për Policinë e Shtetit", i miratuar së fundi, "mospërputhjet" e gradave me funksionin?

Ligji i ri për Policinë e Shtetit, i jep fund të gjithë asaj amullie dhe abuzimi qe lejonte në sistemin grada/funksion, ligji i vjeter. Tani grada përfitohet sipas një kohe të përcaktuar në shërbim, arsimit dhe trajnimeve përkatëse dhe rezultateve në punë. Përfitimi i gradës jep automatikisht dhe funksionin. Pra performanca profesionale është kriteri i fitimit të një funksioni. Askush që nuk plotëson këto kritere nuk mund të perfitoj një funksion të caktuar. Ligji parashikon po ashtu dhe zbutjen e problemit social. Ka hapsirë që një punonjës policie i cili nuk plotëson kriteret për marrjen e gradës pas kohës që ka konsumuar në shërbim, të mos largohet nga policia, nëse dëshiron të mbajë një gradë më të ulët dhe ti jepet një funksion sipas kësaj grade.
Në thelb , ky përcaktim që i bën ligji fitimit të gradës dhe marrjes së funksionin, heq mundësinë e çdo keqpërdorimi në procesin e vendimarrjes në fushën e burimeve njerëzore

Pjesë e këtyre reformave, a do të jenë edhe pagat, shpërblimet dhe pensionet për punonjësit e Policisë së Shtetit?

Sistemi i pagave dhe shpërblimeve mbetet një prioritet tjetër i kësaj qeverie për kujdesin ndaj punonjësit të policisë. Qeveria sapo ka miratuar një rritje të pagës së punonjësit të policisë dhe po ashtu ndryshoj nivelin e trajtimit me ushqim të vaktit që i takon punonjësit të policisë. Punonjësi i policisë trajtohej me ushqim me normën e vitit 1975. Qeveria Berisha, e ndryshoj duke përcaktuar një kuotë e cila i përshtatet tërësisht standarteve të larta.
Shpërblimi që përfitohet për rritje në gradë është i një niveli të kënaqëshëm.
Sistemi i shpërblimit pas realizimit të operacioneve në luftën ndaj krimit dhe trafikut është një praktikë e rëndësishme që ne e aplikojmë dhe do të vazhdojmë në mënyrë intensive.
Gjithsesi sistemi i shpërblimeve dhe pensioneve të punonjësit të policisë do të mbetet një prioitet i padiskutueshëm i kësaj qeverie.



Në kuadrin e aspiratës së shqiptarëve dhe Shqipërisë për t'u bërë pjesë e Bashkimit Evropian, cili do të jetë roli i Ministrisë së Brendshme dhe detyrat e Policisë së Shtetit, në plotësimin e detyrimeve që rrjedhin në ratifikimin e MSA?

Detyrimet që rrjedhin nga MSA janë prioriteti i parë i punës së përditëshme. Ne sapo kemi përfunduar dhe miratuar Planin e Integruar te Ministrisë së Brendëshme. Eshtë një dokument shumë i rëndësishëm i afishuar në faqen elektronike të Ministrisë së Brendëshme. Do të ftoja çdo qytetar ta vizitonte këtë faqe dhe të merrte aty dhe platformën tonë të procesit të integrimit.

Pjesë e këtyre detyrimeve, a janë edhe maarrëveshjet e marrëdhëniet e Ministrisë së Brendshme e Policisë së Shtetit, me homologet respektive të vendeve të rajonit, vendeve kufitare apo edhe vendeve të BE-së, në funksion të luftës së përbashkët kundër krimit e trafiqeve?

Marrveshjet më vendet partnere po marrin gjithnjë e më shumë një dinamikë të madhe. Kemi nënshkruar një sërë marveshjesh të tilla, ku mund të përmend marveshjet me Italin, Greqin, Turqin, Maqedonin, Rumanin, Kroacin, Slloveninë, Bullgarin, Egjiptin, Austrin, Hungarin, Maltën, Ukrainën, Berlgjikën, Zvicërën, Kosovën, etj, si dhe një numër marveshjesh e konventash të bashkëpunimit rajonal. Kemi plane të përbashkëta veprimi me shumë vende partnere dhe sëshpejti do të njihemi me marveshje të jera shumë të rëndësishme

Në ç'fazë janë këto marrëdhënie e marrëveshje?

Ato përfshijnë kryesisht fushën e shkëmbimit të informacionit por edhe të bashkërendimit të veprimtarisë së strukturave përkatëse në luftën kundër krimit të organizuar dhe trafiqeve. Të indentifikimit dhe arrestimit të personave në kërkim. Shumë prej marrveshjeve tashmë janë pasuar nga plane veprimi. Por dinamika e veprimtarisë së përbashkët do të jete një karakteristikë e mëtejshme e këtij bashkëpunimi.


Në Ballkan, një shtet i ri, Kosova, është duke u zyrtarizuar. Cilat janë marrëdhëniet e deritanishme të Ministrisë së Brendshme e Policisë së Shtetit, me homologët kosovarë?

Kemi mardhënie të shkëlqyera bashkëpunimi. Para pak kohësh kishm për vizitë Ministrin e Brendëshëm të Kosovës , dhe shkëmbimi i informacionit dhe bashkërendimi midis strukturave tona policore është konkretizuar me suksese në disa operacioni kryesisht në atë të parandalimit të trafikut të armëve të lehta dhe drogës. Besoj se ky bashkëpunim i rëndësishëm jo vetëm për të dy vëndet tona do të forcohet akoma më shumë pas marrjes së pamvarësisë nga Kosova.



Po për sa i përket trajnimeve apo shkëmbimeve të përvojës, krahas edhe asistencave respektive teknike, të shkëmbyer me Shqipërisë e Kosovës, ekzistojnë projekte konkrete, kur policia e saj, konsiderohet "e re"?

Policia e Kosovës vërtet është një strukturë e re por eksperienca dhe bashkëpunimi me UNMIK dhe organizatat e tjera që e asistojnë ja kanë rritur shumë nivelin e profesionalizmit. Padyshim që ne jemi të gatëshëm të ofrojmë asistencë në arsimimin policor dhe atë përvojë që ka policia shqiptare ne goditjen ndaj krimit të organizuar dhe çdo lloj tjetër veprimtarie kriminale. Në hapsirën e bashkëpunimit të sotëm me partnerët ka një mundësi të madhe të shkëmbimit të përvojave, shkëmbimit të informacioneve dhe bashkërendimit të aktiviteteve.