FJALA E MINISTRIT TE BRENDSHEM
                                                                  NE TAKIMIN E KARTES SE ADRIATIKUT

I nderuar Z. Kryeministër,
Të nderuar pjesëmarrës,


Është kënaqësi e veçantë për mua të marr pjesë në Konferencën për Zgjerimin e Kartës së Adriatikut me 2 anëtarë të rinj.

Anëtarësimi i Bosnjë Hercegovinës dhe i Malit të Zi na jep mundësinë të forcojmë partneritetin tonë në luftën kundër korrupsionit, krimit të organizuar, trafikimit të qenieve njerëzore, armëve dhe drogave si dhe të përforcojmë bashkëpunimin për sigurinë e kufijve.

SIGURIA KUFITARE – MANAXHIMI I INTEGRUAR I KUFIJVE është pjesë integrale e sigurisë kombëtare, e sigurisë rajonale dhe në përgjithësi e asaj globale.

Në kuadër të proceseve të ndryshme që kanë përfshirë të gjitha vendet e rajonit dhe veçanërisht vendin tonë në rrugën e integrimit, siguria dhe stabiliteti i një vendi ndikon ndjeshëm në sigurinë dhe stabilitetin e vendeve fqinjë dhe më gjerë.

Strategjia Kombëtare për Menaxhimin e Integruar të Kufirit, është dokumenti kryesor me të cilën ky shërbim organizon, orienton dhe mbështet punën e tij për garantimin e sigurisë në Kufi. Ky dokument është mbështetur në Rekomandimet e BE-së për Menaxhimin e Integruar të Kufijve, të detyrimeve që rrjedhin nga nënshkrimi dhe ratifikimi i Konventave të ndryshme ndërkombëtare në fushën e sigurisë, në kuadër të angazhimeve të Shqipërisë në shumë nisma rajonale të bashkëpunimit në këto fusha, etj., dhe veçanërisht në kuadër të realizimit të detyrimeve në zbatim të MSA-së dhe angazhimeve për anëtarësimin në NATO.

Garantimi i sigurisë në kufijtë e brendshëm të vendit, është kontribut në garantimin e kufijve të jashtëm të vendeve me të cilat kufizohemi dhe në mënyrë të veçantë të kufijve të jashtëm te Bashkimit Evropian. Shqipëria garanton sigurinë në kufijtë e jashtëm të BE-së, me Italinë dhe Greqinë dhe me vendet fqinje me Malin e Zi, Kosovën dhe Maqedoninë.
Për realizimin e këtij bashkëpunimi, ne rajon janë ndërmarre dhe po punohet ne disa nisma te përbashkëta nga te cilat dalin dhe detyrime te përbashkëta për te gjitha vendet nënshkruese si:
- Konventa e Vjenes ”Per bashkepunimin Policor ne mes vendeve te Europes Jug – Lindore.
- Deklarata e Ohrit ne kuader te Paktit te Stabilitetetit “Per Menaxhimin e Integruar te Kufijve”
- Deklarata e Ministrave te Brendshem te vendeve te Rajonit te Ballkanit Perendimor , ne Sarajeve 2006, etj.
Aktualisht me vendet fqinje:
- Kryejmë takime ne mes Drejtuesve te Policisë Kufitare ne te tre nivelet,- lokal, rajonal dhe qendror.
- Kemi Protokolle per Patrulla te Përbashkëta dhe kryejmë patrullime te përbashkëta me Maqedoninë, Malin e Zi.
- Kryejmë operacione te përbashkëta me Policinë Kufitare Greke
- Kemi një marrëveshje per ndërtimin e një Pike te Përbashkët te Kalimit Kufitar me Malin e Zi.

LUFTA KUNDER KRIMIT TË ORGANIZUAR
Dokumenti kryesor i cili përcakton qëllimet dhe objektivat në luftën kundër krimit të organizuar është Strategjia e Luftës Kundër Krimit të Organizuar, Trafiqeve dhe Terrorizmit 2008 – 2013, një strategji ombrellë, pjesë përbërëse e të cilës, janë pesë strategji sektoriale dhe konkretisht:
• Strategjia Ndërsektoriale për Parandalimin e Luftës Kundër Korrupsionit 2007 – 2013
• Strategjia Kombëtare Antidrogë 2004 – 2010 dhe plani i veprimit përkatës
• Strategjia Kombëtare Kundër Trafikimit të qenieve njerëzore 2008 – 2010 dhe plani përkatës i veprimit.
• Strategjia Kombëtare Për Luftën Kundër Trafikimit të Femijëve 2008 – 2010 dhe plani i veprimit përkatës (kjo strategji është dokument plotësues i strategjisë K.T.Q.Njerëzore).
• Plani Kombëtar i Veprimit për Parandalimin e Trafikimit të Mjeteve Motorike.

LUFTA KUNDËR KORRUPSIONIT

Policia e Shtetit gjatë këtyre viteve të fundit ka pasur dhe ka prioritet luftën kundër korrupsionit, me objektiva të përcaktuar në programin vjetor dhe periodik të punës të Policisë së Shtetit, Departamentit për Hetimin e Krimeve dhe Drejtorisë Kundër Krimit Financiar.

Qeveria shqiptare ka miratuar Strategjinë Ndersektoriale për Parandalimin dhe Luftën Kundër Korrupsionit dhe për Qeverisjen Transparente, për periudhën 2008-2013, për implemtentin e së cilës Policia e Shtetit ka programuar detyra specifike për këtë periudhë dhe për vitet në vazhdim. Policia e shtetit ka hartuar Planin e Veprimit për Parandalimin dhe Luftën kundër Korrupsionit në zbatim të strategjisë.

Vitet e fundit shenojne një rritje të ndjeshme të forcës goditëse të veprave penale të korrupsionit dhe krimeve në detyrë. Një numër gjithnjë e më i madh zyrtarësh të korruptuar të nivelit të mesëm dhe të lartë janë arrestuar dhe ndaj tyre ka filluar ndjekja penale nga organet e drejtësisë. Nga Policia e Shtetit për periudhën 2005-2008, janë evidentuar dhe referuar për fillimin e ndjekjes penale 516 raste të veprave penale të korrupsionit, krimeve në detyrë të nëpunësve publikë me 951 autorë të dyshuar, prej të cilëve të 193 të arrestuar e të ndaluar. Nga këto 112 vepra penale të korrupsionit pasiv dhe aktiv, 403 vepra penale të kryera nga punonjës shtetërorë e publikë.

Me implementimin e Ligjit të ri “Për Policinë e Shtetit”, u rritën në mënyrë të ndjeshme kapacitetet institucionale dhe strukturore për goditjen e krimit financiar, korrupsionit dhe pastrimit të parave. Me organizimin e ri të Policisë së Shtetit, u krijua Drejtoria Kundër Krimit Financiar në Departamentin për Hetimin e Krimeve.

TRAFIKU I ARMËVE

Një numër i konsiderueshëm personash janë penalizuar nga Gjykata e Krimeve të Rënda për trafikim të armeve dhe municioneve luftarake, ndërkohë që janë në proces hetimor e gjyqësor disa subjekte për këtë vepër penale.

Për të realizuar një ndjekje në kohë të shpejtë, për përpunimin e shpejtë të informacioneve dhe goditjen e organizatave kriminale që përfitojnë nga këto aktivitete, janë shfrytëzuar kontaktet me agjencite e zbatimit të ligjit në vendet fqinje si Kosova, Mal i Zi, Maqedonia etj, duke shkëmbyer informacione, koordinuar veprime etj.

Vitet e fundit, si rezultat i aplikimit të metodave speciale të hetimit janë shënuar rezultate të kënaqshme në drejtim të luftës kundër trafikimit të armëve dhe municioneve luftarake ku janë goditur disa grupe kriminale, ku vlen të permendet bashkëpunimi i frytshëm me Prokurorine për Krime të Renda, punë e cila ka çuar dhe në minimizimin e këtij fenomeni.

TRAFIKIMI I QENIEVE NJERËZORE

Strategjia e re Kombëtare 2008-2010 paraqet një kuadër të gjerë veprimesh që ashtu si në strategjinë e mëparshme, shtrihen në katër drejtime prioritare, hetim dhe ndjekje penale e suksesshme, mbrojtje e viktimave, parandalim dhe bashkërendim veprimesh. Strategjia e re kërkon një bashkërendim të mirë ndër-institucional, vazhdimin e funksionimit të plotë të Komiteteve Rajonale Anti-Trafik, të Mekanizmit Kombëtar të Referimit për Viktimat e Trafikimit, përmirësimin e procesit dhe instrumenteve të identifikimit të viktimave të mundshme të trafikimit, informacion statistikor të unifikuar, masa parandaluese si dhe rritje e asistencës sociale dhe mbrojtjes së viktimave të trafikimit.

Në këtë kuadër, me urdhër të Kryeministrit, nr. 203, datë 19.12.2005, “Për mënyrën e Funksionimit të Njësisë Antitrafik” u ngrit Njësia Antitrafik. Kjo zyrë funksionon pranë Ministrisë së Brendshme, dhe në ushtrimin e funksioneve të saj drejtohet nga Koordinatori Kombëtar për Luftën kundër Trafikimit të Qenieve Njerëzore/Zëvendësministri i Brendshëm.

Është hera e parë që në Shqipëri institucionet shtetërore dhe jo shtetërore raportojnë të njëjtin numër statistikash përsa i përket viktimave dhe viktimave të mundshme të trafikimit të asistuara dhe të referuara nga institucione të ndryshme.

Mekanizmi Kombëtar Referues ka rezultuar efikas. Në përbërje të këtij Mekanizmi është dhe Autoriteti Përgjegjës për ndihmën që duhet dhënë për viktimat e trafikut të qenieve njerëzore.

Lidhur me luftën kundër trafikimit të qenieve njerëzore, përpara pak ditësh, Departamenti Amerikan i Shtetit (DASH), ka paraqitur Raportin e Ndërmjetëm. Në raport vlerësohej progresi i dukshëm i bërë nga Shqipëria në përpjekjet e saj për të luftuar trafikimin e qenieve njerëzore, që nga dalja e Raportit 2008, ku ndër të tjera thuhej se:
 Qeveria Shqiptare ka demonstruar përmirësime rrënjësore në identifikimin e viktimave të trafikimit;
 Është rritur numri i ndjekjeve penale dhe hetimeve;
 Masat e dënimit të dhëna ndaj trafikantëve kanë qenë të duhurat dhe të rrepta;
 Gjatë 6-mujorit të parë të vitit 2008, qeveria intensifikoi përpjekjet për dhënien e trajnimeve për zyrtarë, duke përfshirë këtu dhe zhvillimin dhe dhënien e një kursi nga Policia e Shtetit;
 Qeveria caktoi rreth 20 police femra antitrafik në drejtoritë kundër krimit të organizuar në të gjithë vendin;
 Zyrtarët punuan për përmirësimin e funksionimit të Mekanizmit Kombëtar të Referimit për Viktimat, duke identifikuar të paktën pesë herë më shumë viktima se në vitin e kaluar;
 U lançua baza zyrtare e të dhënave, e cila mbledh informacion mbi menaxhimin e rasteve specifike të trafikimit;

ANTIDROGA
Strategjia Kombëtare Antidrogë 2004-2010 është multisektoriale. Për zbatimin e saj është hartuar dhe po zbatohet një Plan Veprimi. Përsa i përket detyrave të Policisë së Shtetit në këtë plan veprimi dhe në Strategjinë Kombëtare, janë realizuar pothuajse të gjitha detyrat, konkretisht, është krijuar infrastruktura ligjore, operacionale dhe financiare për aplikimin e disa teknikave specifike të luftës kundër drogës.
Kështu, ka përfunduar me sukses procesi i rregullimit te procedurave standarte per sekuestrimin, ruajtjen e asgjesimin e lendeve narkotike te sekuestruara shoqeruar me krijimin e infrastruktures se nevojshme per mbeshtetjen e ketyre procedurave ku ështe hartuar dhe miratuar Udhëzimi i ri i Përbashkët mes Prokurorit të Përgjithshëm, Ministrit të Brendshëm dhe Ministrit te Shendetesise “Për trajtimin e lëndëve narkotike apo psikotrope”, ne te cilin jane pershkruar procedurat standarte qe ndjek policia dhe prokuroria qe nga momenti i sekuestrimit te lendeve narkotike deri ne asgjesimin e sigurte te tyre.
Nga muaji Maj 2008, ka filluar nga funksionimi me kapacitet të plotë, magazina qendrore për ruajtjen e drogave të sekuestruara nga policia, pas zbatimit me sukses të një projekti të financuar nga Mbretëria e Bashkuar. Për këtë qëllim, në kuadër të të njëjtit projekt, është ndërtuar një krematorium për asgjësimin e sigurt të lëndëve narkotike.
Duke qene pjese e deges jugore te “rruges ballkanike”, Shqiperia konsiderohet si nje vend tranzit per trafikun e heroines, por duhet te themi se tre vitet e fundit, trafiku i droges me origjine apo te tranzituar nga Shqiperia ka rene ne menyre konstante nga viti ne vit. Statistikat e vendeve fqinje qe jane vendet kryesore te destinacionit si Italia dhe Greqia e konfirmojne kete konkluzion.

Vitet e fundit janë arritur rezultate shumë të mira në luftën kundër kultivimit të kanabisit. Si rezultat i kombinimit të masave parandaluese dhe atyre shtrënguese, zonat e kultivuara me bimë narkotike gjatë kësaj periudhe, kanë qenë shumë të kufizuara. Edhe këto pak zona, policia ka ndërmarrë operacione të gjera dhe është bërë asgjesimi në një masë të madhe i tyre.

Për periudhën 2005-2008 janë zhvilluar 114 operacione ku janë përdorur teknikat speciale të hetimit dhe janë goditur 109 grupe kriminale të trafikut dhe shpërndarjes së lëndëve narkotike me 430 persona.

Gjithashtu jane kryer edhe 36 operacione nderkombëtare në bashkëpunim me Prokurorinë dhe autoritetet gjyqësore të vendeve të ndryshme, nga të cilat: 21 me Italinë; 4 me Gjermaninë ; 1 i përbashkët me SHBA dhe Gjermaninë ; 2 me SHBA ; 2 me Greqinë ; 3 me Turqinë ; 2 me Maqedoninë, 1 me Zvicrën, ku janë arrestuar 86 persona.

Në përfundim të fjalës sime, duke falënderuar dhe njëherë organizatorët e Konferencës për Zgjerimin e Kartës së Adriatikut, dëshiroj t’i uroj sukses dy vendeve të reja, Bosnjë Hercegovinës dhe Malit të Zi si dhe t’ju siguroj në emër të Qeverisë Shqiptare dhe Ministrisë së Brendshme për forcimin e partneritetit në luftën kundër korrupsionit, krimit të organizuar, trafikimit të qenieve njerëzore, armëve dhe drogave si dhe për sigurinë e kufijve.


Faleminderit